Den milde vinteren kan ha gjort at mange ikkje har fått tatt dei skiturane dei ville. Som følgje av dette kan det verta ekstra stort press på utfartsstadane og parkeringsplassane i påska.

– Trafikantar må sjølve passa på at dei ikkje parkerer bilar langs veg på innsida av kvitstripa. Dette kan føra til trafikkfarlege situasjonar og problem for vinterdrift av vegen for entreprenøren, seier avdelingsdirektør Svenn Finden i Statens vegvesen.

Bilar som står feilparkert kan risikera borttauing.

– Dette gjeld på alle Statens vegvesen sine fjellovergangar i vest: riksveg 13 Vikafjellet, riksveg 7 Hardangervidda, E134 Haukeli, E16 Filefjell, riksveg 52 Hemsedalsfjellet og riksveg 15 Strynefjellet, presiserer Finden.

Statens vegvesen ynskjer alle ei god og trygg påske.