I Hurdalsplattforma vart det varsla at regjeringa ønsker å utgreie korleis utbygging, drift og vedlikehald av vegane skal organiserast, med bakgrunn i at stadig fleire utbyggjarar og vegeigarar kan bidra til auka kostnadar, meir fragmenterte fagmiljø og mindre samanhengande utbygging.

Bakgrunnen for dette er dei store endringane i sektoren, som er knytt til både etableringa av Nye Veier og avviklinga av Sams vegadministrasjon.

Regjeringa fekk mange gode innspel både då dei inviterte til møte om organisering av vegsektoren i 2022, og skriftleg i etterkant av møtet. Både grenseflata mellom stat og fylka, og arbeidsdelinga mellom Statens vegvesen på statleg side vart løfta fram som problematisk.

No lyser Samferdselsdepartementet ut eit eksternt oppdrag for å vurdere om dagens organisering av vegsektoren på statleg nivå samla sett bidreg til effektiv ressursutnytting, politisk styring og ivaretaking av dei overordna måla i Nasjonal Transportplan (NTP).

– Sjølv om vi ikkje gjer ei evaluering av oppløysinga av Sams vegadministrasjon no, betyr ikkje det at vi ikkje tek tak i dei problemstillingane vi og andre erfarer etter omorganiseringa. I dette arbeidet vert det også relevant å følje opp kritikken frå Riksrevisjonens rapport om drift- og vedlikehald – ein rapport eg tek på alvor, seier Nygård.

Samferdselsdepartementet legg opp til at denne delen av arbeidet vert handtert gjennom dialog med fylkeskommunane/KS, Statens vegvesen og Nye Veier, slik at ein saman kan sjå på eventuelle behov for justeringar av arbeidsform innan noverande ansvarsdeling.

Departementet ønsker å oppnå effektiv bruk av ressursane i sektoren, betre informasjonsflyt, beredskap, rolledeling og samarbeid. Departementet legg opp til ein omtale i Nasjonal transportplan, som vert lagt fram neste vår.

– Vi er opptekne av å spele på lag med dei gode fagmiljøa våre. Vi veit at det jobbar mange flinke fagfolk i denne sektoren, og mange av desse har strukke seg langt for å levere godt, til tross for at omorganiseringa har kravd mykje krefter dei siste åra, seier Nygård.