Under Solberg-regjeringa blei Spordrift AS i 2019 skilt ut som eit dotterselskap eigd av Bane NOR SF.For å leggje til rette for rettferdig konkurranse om drifts- og vedlikehaldstenester i regi av Bane NOR, blei eigarskapen til Spordrift overført til Samferdselsdepartementet i 2021.

– Drift og vedlikehald av jernbaneinfrastrukturen er kritisk kjernekompetanse, som Bane NOR bør ha direkte kontroll over. Vi kan då ikkje splitte opp infrastrukturen ved å konkurranseutsetje desse tenestene i fleire små geografiske vedlikehaldspakker. Det medfører risiko for at eigen kompetanse forvitrar og at internasjonale aktørar tek over, seier samferdselsministeren.

Store fordelar med Spordrift som ein divisjon i Bane NOR

Samferdselsdepartementet vil om kort tid kalle inn til til ekstraordinært foretaksmøte i Bane NOR, På møtet skal det gjerast vedtak om at Spordrift tas inn i Bane NOR som ein divisjon.

– Ved å integrere Spordrift som ein divisjon i Bane NOR, får vi ein meir heilskapeleg kontroll over tilstanden på jernbaneinfrastrukturen. Dette kan bidra til raskare utvikling av eit moderne vedlikehaldssystem. Målet er sjølvsagt færre forseinkingar og innstillingar i togtrafikken, samstundes som vi bruker pengane til vedlikehald på ein god måte. Eg ser difor store fordelar ved å tilbakeføre Spordrift til Bane NOR, seier Nygård.

1300 medarbeidarar

Om lag 1300 medarbeidarar i Spordrift blir overførte til Bane NOR.

– Eg vil takke Spordrift og dei tilsette for jobben dei har gjort. Eg ser fram til at dei om lag 1300 medarbeidarane i Spordrift vil halde fram med sin viktige innsats for jernbanen som ein del av Bane NOR, seier samferdselsministeren.